– 5 Mei 2018
– deur John Jessup

As sy naamgenoot en bedieningsopvolger, dra Franklin Graham die nalatenskap van wyle ds. Billy Graham miskien meer as enigiemand anders. Hy het gesien hoe sy pa as ‘n man en vader, ‘n evangelis, en in sy persoonlike verhouding met sy Here en Verlosser Jesus Christus geleef het.

Franklin skryf hieroor en meer in sy nuwe boek, Through My Father’s Eyes. In ‘n onderhoud met CBN News het hy die projek van 12 jaar as ‘n liefdesdiens beskryf.

“Ek wil hê hierdie boek moet juis nie oor Billy Graham gaan nie,” het hy verduidelik. “Ek wil hê mense moet sien dat dit nie Billy Graham was wat geskiedenis gemaak het nie. Dit was God agter Billy Graham wat hom daar geplaas het en dit is omdat Billy Graham op God vertrou het.” 

Franklin Graham se verklaring weerspieël sy pa se eie woorde, wat ‘n diep, maar opregte nederigheid weerspieël het.

Twee maande nadat die evangelis gesterf het, wonder sommige wie die volgende Billy Graham gaan wees? Franklin het sy siening met CBN News gedeel. “Ek weet nie. Ek is nie ‘n evangeliese leier nie,” het hy gesê. “Ek gaan net voort om die Evangelie te verkondig. Ek hou aan om ‘n uitnodiging te maak aan verlore mense om hul geloof in Jesus Christus te plaas.”

“Ek dink die vraag wat sommige mense vra, is: ‘Wie is die volgende bekende evangelis?’ Ek het geen idee nie. My pa wou nooit ‘n bekende persoon wees nie. Miskien is dit hoekom God hom gebruik het.”

Graham, wat die Billy Graham Evangelistic Association en Samaritan’s Purse lei, glo dat Christene heelhartig gefokus moet wees om siele vir Christus te wen.

Tog sien hy ook die behoefte aan konfrontasie, veral in die hedendaagse anti-Christelike kultuur. Graham het onlangs GQ Magazine geteiken omdat dit die Bybel verwerp het as ‘n Boek wat nie die moeite werd is om te lees nie.

“Ek wil nie hê Christene moet mislei word deur hierdie kultuur waarin ons leef nie,” het hy verduidelik. “En ek dink daar moet ‘n stem wees wat luid klink omdat daar nie baie mense is wat hulle stem dik maak nie.” 

Graham het aan CBN News gesê hy praat omdat ander te bang is: “Ek dink wanneer jy praat, en verwoord wat ander te bang is om te sê, sal God dit eer.”

Graham het verduidelik watter leemte die verlies van sy ma, Ruth, in sy lewe veroorsaak het. “Ek het gevoel my moeder se gebede het ons oordek en ek het dit nie meer nie,” het Graham verduidelik.

Die verlies van sy pa – wat in sy laaste jare ook  vurig vir die familie gebid het – het nog ‘n leemte gelaat. “En noudat my pa weg is, voel ek dat daar ʼn gaping is. Dit is nie ‘n mantel nie, dit is asof ‘n stuk van die wapenrusting weg is. Dit laat my harder bid – nie net vir myself nie, maar vir my familie, vir my kinders en my kleinkinders,” het hy gesê.

“Die gebedslas het nou na my skouers verskuif, vir die laaste tien jaar was hy die gebedstryder vir die familie,” het Graham gesê.


Bron: www1.cbn.com

Return to Home

Gee Jou Mening


Deur aan te teken, gee jy toestemming om ons insiggewende weeklikse nuusbrief te ontvang.
Jy kan te enige tyd kies om dit te kanselleer.